Kv, part 171 · Abhidhamma Pitaka – Pāli · Verses Across
Buddhism · Abhidhamma Pitaka (Pāli only)
Kv, part 171
Navattabbaṁsaṅghodakkhiṇaṁvisodhetītikathā
PāliPali
Pāli only: every English translation of the Abhidhamma is still under copyright, so no English can be shown yet. A free translation will be added if one becomes available.
Na vattabbaṁ— “saṅgho dakkhiṇaṁ visodhetī”ti? Āmantā. Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti? Āmantā. Hañci saṅgho āhuneyyo …pe… anuttaraṁ puññakkhettaṁ lokassa, tena vata re vattabbe— “saṅgho dakkhiṇaṁ visodhetī”ti.
Na vattabbaṁ— “saṅgho dakkhiṇaṁ visodhetī”ti? Āmantā. Nanu cattāro purisayugā aṭṭha purisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe— “saṅgho dakkhiṇaṁ visodhetī”ti.
Na vattabbaṁ— “saṅgho dakkhiṇaṁ visodhetī”ti? Āmantā. Nanu atthi keci saṅghassa dānaṁ datvā dakkhiṇaṁ ārādhentīti? Āmantā. Hañci atthi keci saṅghassa dānaṁ datvā dakkhiṇaṁ ārādhenti, tena vata re vattabbe— “saṅgho dakkhiṇaṁ visodhetī”ti.
