Buddhism · Abhidhamma Pitaka (Pāli only)

Kv, part 174

Navattabbaṁbuddhassadinnaṁmahapphalantikathā

PāliPali

Pāli only: every English translation of the Abhidhamma is still under copyright, so no English can be shown yet. A free translation will be added if one becomes available.

Na vattabbaṁ— “buddhassa dinnaṁ mahapphalan”ti? Āmantā. Nanu bhagavā dvipadānaṁ aggo, dvipadānaṁ seṭṭho, dvipadānaṁ pamokkho, dvipadānaṁ uttamo, dvipadānaṁ pavaro asamo asamasamo appaṭisamo appaṭibhāgo appaṭipuggaloti? Āmantā. Hañci bhagavā dvipadānaṁ aggo, dvipadānaṁ seṭṭho, dvipadānaṁ pamokkho, dvipadānaṁ uttamo, dvipadānaṁ pavaro asamo asamasamo appaṭisamo appaṭibhāgo appaṭipuggalo, tena vata re vattabbe— “buddhassa dinnaṁ mahapphalan”ti.

Na vattabbaṁ— “buddhassa dinnaṁ mahapphalan”ti? Āmantā. Atthi koci buddhena samasamo— sīlena samādhinā paññāyāti? Natthi. Hañci natthi koci buddhena samasamo— sīlena samādhinā paññāya, tena vata re vattabbe— “buddhassa dinnaṁ mahapphalan”ti.

Na vattabbaṁ— “buddhassa dinnaṁ mahapphalan”ti? Āmantā. Nanu vuttaṁ bhagavatā—

“Nayimasmiṁ vā loke parasmiṁ vā pana, Buddhena seṭṭho ca samo ca vijjati; Yamāhuneyyānaṁ aggataṁ gato, Puññatthikānaṁ vipulapphalesinan”ti.

Attheva suttantoti? Āmantā. Tena hi buddhassa dinnaṁ mahapphalanti. Na vattabbaṁ buddhassa dinnaṁ mahapphalantikathā niṭṭhitā.