Verses Across™
      • 123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150151152153154155156157158159160161162163164165166167168169170171172173174175176177178179180181182183184185186187188189190191192193194195196197198199200201202203204205206207208209210211212213214215216217218219

About, terms & privacy · ·

Buddhism · Abhidhamma Pitaka (Pāli only)

Kv, part 197Maggakathā

18

Buddhism · Abhidhamma Pitaka (Pāli only)

Kv, part 197

Maggakathā

PāliPali

Pāli only: every English translation of the Abhidhamma is still under copyright, so no English can be shown yet. A free translation will be added if one becomes available.

Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṁ— sammādiṭṭhi …pe… sammāsamādhīti? Āmantā. Hañci aṭṭhaṅgiko maggo vutto bhagavatā, seyyathidaṁ— sammādiṭṭhi …pe… sammāsamādhi, no ca vata re vattabbe— “pañcaṅgiko maggo”ti.
Pañcaṅgiko maggoti? Āmantā. Nanu vuttaṁ bhagavatā—
“Maggānaṁ aṭṭhaṅgiko seṭṭho, Saccānaṁ caturo padā; Virāgo seṭṭho dhammānaṁ, Dvipadānañca cakkhumā”ti.
Attheva suttantoti? Āmantā. Tena hi aṭṭhaṅgiko maggoti.
Sammāvācā maggaṅgaṁ, sā ca na maggoti? Āmantā. Sammādiṭṭhi maggaṅgaṁ, sā ca na maggoti? Na hevaṁ vattabbe …pe… sammāvācā maggaṅgaṁ, sā ca na maggoti? Āmantā. Sammāsaṅkappo …pe… sammāvāyāmo …pe… sammāsati …pe… sammāsamādhi maggaṅgaṁ, so ca na maggoti? Na hevaṁ vattabbe …pe….
Sammākammanto …pe… sammāājīvo maggaṅgaṁ, so ca na maggoti? Āmantā. sammādiṭṭhi …pe… sammāsamādhi maggaṅgaṁ, so ca na maggoti? Na hevaṁ vattabbe …pe….
Sammādiṭṭhi maggaṅgaṁ, sā ca maggoti? Āmantā. Sammāvācā maggaṅgaṁ, sā ca maggoti? Na hevaṁ vattabbe …pe… sammādiṭṭhi maggaṅgaṁ, sā ca maggoti? Āmantā. Sammākammanto …pe… sammāājīvo maggaṅgaṁ, so ca maggoti? Na hevaṁ vattabbe …pe….
Sammāsaṅkappo …pe… sammāvāyāmo …pe… sammāsati …pe… sammāsamādhi maggaṅgaṁ, so ca maggoti? Āmantā. Sammāvācā …pe… sammākammanto …pe… sammāājīvo maggaṅgaṁ, so ca maggoti? Na hevaṁ vattabbe …pe….
Ariyo aṭṭhaṅgiko maggoti? Āmantā. Nanu vuttaṁ bhagavatā— “pubbeva kho panassa kāyakammaṁ vacīkammaṁ ājīvo suparisuddho hoti; evamassāyaṁ ariyo aṭṭhaṅgiko maggo bhāvanāpāripūriṁ gacchatī”ti. Attheva suttantoti? Āmantā. Tena hi pañcaṅgiko maggoti.
Pañcaṅgiko maggoti? Āmantā. Nanu vuttaṁ bhagavatā— “yasmiṁ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi …pe… tatiyopi …pe… catutthopi tattha samaṇo upalabbhati. Imasmiṁ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda, samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī”ti. Attheva suttantoti? Āmantā. Tena hi aṭṭhaṅgiko maggoti. Maggakathā niṭṭhitā.

Spotted a mistake or have an idea?

Kv, part 196Kv, part 198
Sources & credits: Pāli

Pāli — Abhidhamma Piṭaka (Pāli, Mahāsaṅgīti edition) (Pāli canon; Mahāsaṅgīti Tipiṭaka edition). CC0 (public domain dedication). Pāli text (Mahāsaṅgīti edition) via SuttaCentral, CC0. Source

Numbers in the margin count the paragraphs of each discourse; SuttaCentral’s own segment numbering is the same in every language, so the versions line up exactly.